Coldplay-hoofsanger Chris Martin sukkel met 'ernstige' longinfeksie

Die musiekgroep, Coldplay se sterkunstenaar, Chris Martin, is met 'n "ernstige" longinfeksie gediagnoseer.

'n Verteenwoordiger van die groep het op Dinsdag 4 Oktober na sosiale media gegaan om te deel dat die musikant ongesteld is en gevolglik vir 'n paar weke nie sal kan optree nie.

"Weens 'n ernstige longinfeksie is Chris onder streng doktersbevele geplaas om vir die volgende drie weke te rus," het die verteenwoordiger geskryf.

"Ons is optimisties dat Chris ná die voorgeskrewe mediese onderbreking na goeie gesondheid sal terugkeer en sien daarna uit om die toer so gou moontlik te hervat."

As gevolg van die nuus is Coldplay se komende 'Music of the Spheres' Wêreldtoerkonserte in Rio de Janeiro en São Paulo, Brasilië, tot vroeg in 2023 uitgestel.

"Vir almal in Brasilië wat uitgesien het na hierdie konserte, is ons baie jammer vir enige teleurstelling en ongerief, en ons is so dankbaar vir u begrip in hierdie uitdagende tyd waar ons Chris se gesondheid moet prioritiseer," lui die verklaring.

"Aan almal wat geraak word, aanvaar asseblief ons opregte verskoning en bedank julle soos altyd vir julle liefde en ondersteuning."